Mamlakatimiz sarhadlari orqali tovar-moddiy boyliklarni olib oʻtish jarayonida turli qonunbuzarliklarni oldini olishda kinologiya sohasi muhim ahamiyatga ega. Shu boisdan ushbu sohada mavjud muammo va masalalarga yechim topish maqsadida, Milliy kinologiya markazi direktori F.Qahhorov Qoraqalpogʻiston Respublikasida boʻldi.

Xususan, markaz ishchi guruhi tomonidan “Dovud-ota”, “Xoʻjayli” chegara “Qoraqalpogʻiston” temir yoʻl, “Nukus aeroporti” chegara bojxona postlarida xizmatni oʻtayotgan kinologlar va xizmat itlari uchun yaratilgan sharoitlar, ularning ish samaradorligi oʻrganildi.

Oʻrganishlar davomida har bir kinolog bilan suhbat tashkil etilib, xizmat itlarini saqlash, parvarishlash, oziqlantirish qoidalari boʻyicha tushuntirishlar berildi. Kinologlarning bojxona sohasida nazariy bilimlarini oshirish borasida sayyor oʻquv mashgʻulotlari olib borildi. Shuningdek, xizmat itlarining ish qobiliyati sinovdan oʻtkazildi.

Maʼlumot oʻrnida, Qoraqalpogʻiston Respublikasi bojxona boshqarmasi kinologlari oʻzlariga biriktirilgan xizmat itlari yordamida 2023-yilning 1-yarim yilligi davomida 818,97 gr giyohvandlik vositalari, 250 dona psixotrop tabletkalar, 38 ta gilza, 1800 ta kapsula va 2 ta pnevmatik qurollarning noqonuniy aylanmasiga chek qoʻyishdi.