Fransiya poytaxtida oʻtkazilayotgan yozgi Olimpiada oʻyinlarida oʻzbek sportchilari oʻz yurishlarini davom ettirmoqda. Afsuski, oʻzining tarixiy yurishida U-23 jamoasi “C” guruhida soʻnggi oʻrinni egalladi.

Jamoa “C” guruhida Ispaniya, Misr va Dominikan respublikasi bilan bir guruhdan joy olgan edi.

U-23 Ispaniyaga 1:2, Misrga esa 0:1 hisobida yutqazdi, amerika vakillari bilan esa durangga imzo chekdi.

Oʻzbekistonlik futbolchilar turnirda 2 ta gol urdi. Ularning biriga Italiyaning “Roma” klubi aʼzosi Eldor Shomurodov, yana biriga esa Alisher Odilov mualliflik qildi. Shuningdek, bitta golli uzatma jamoa sardori Eldor Shomurodov hisobiga yozilgan.

Darvozamizni qoʻriqlagan Abdulvohid Neʼmatov 2 ta, Vladimir Nazarov esa bitta toʻpni oʻtkazib yubordi. Jasur Jaloliddinov, Abdurauf Boʻriyev, Diyor Xolmatov, Umarali Rahmonaliyev va Abdulqodir Husanov turnir davomida sariq kartochkaga loyiq topildi.

Musobaqa davomida 2 ta golimiz ofsayd sababli VAR yordamida bekor qilingan boʻlsa, aynan VAR yordamida darvozamiz tomon 2 ta penalti belgilandi.