Joriy yilning 12-14-iyul kunlari Transport vaziri oʻrinbosari Jasurbek Choriyev boshchiligidagi delegatsiya rasmiy tashrif bilan Gruziyaning Batumi shahriga tashrif buyurdi. Ishchi tashrifning birinchi kunida delegatsiya Gruziya dengiz transporti agentligi direktori A.Ahvlediani bilan ikki tomonlama hamkorlikni rivojlantirish masalasida uchrashuv oʻtkazdi.

Tashrifning ikkinchi kuni Transport vazirligi vakillari Poti, Batumi, Anakliya, Poti erkin iqtisodiy zonasi hamda Sarpi chegara nazorat oʻtkazish punkti faoliyati bilan tanishishdi. 14-iyul kuni esa delegatsiya vakillari Kutaisi xalqaro aeroportiga tashrif buyurishdi.

Shuningdek, Gruziya iqtisodiyot va barqaror rivojlanish vazirining oʻrinbosari G. Guramishvili bilan uchrashuv oʻtkazildi. Unda Oʻzbekiston eksport-import yuklari tashuvlarini amalga oshirishda Gruziyaning Poti va Batumi portlari mavjud infratuzilmasidan samarali foydalanish, shuningdek, Oʻzbekiston biznesi vakillari tomonidan Gruziya portlari hududida port terminallarini qurish boʻyicha bildirilgan takliflar muhokama etildi.