Guliston davlat universitetida birinchi kurs talabalarining mazkur oliy taʼlim muassasasi hayotiga moslashishi, intellektual salohiyatini yuksaltirishi va kelajak sari dadil qadam qoʻyishiga koʻmaklashish maqsadida “Birinchi kurs maktabi” loyihasi amalga oshirilmoqda.

Mazkur loyiha doirasida Oʻzbekiston yoshlar ittifoqi Guliston davlat universiteti boshlangʻich tashkiloti tomonidan birinchi bosqich talabalari oʻrtasida “Zakovat” intellektual oʻyinlariga start berildi. Har haftada 2 marotaba oʻtkaziladigan ushbu bahslar sentyabr oyining oxirida yakunlanadi. Intellektual bahslarda 1, 2, 3-oʻrinlarni qoʻlga kiritgan jamoalarga ichki turizm yoʻnalishlari boʻyicha sayohat yoʻllanmasi taqdim etiladi.

— Bu kabi intellektual bellashuvlar oliy oʻquv yurtimizda chuqur bilim olishni maqsad qilgan birinchi bosqich talabalarining oʻqib-oʻrganishga boʻlgan ishtiyoqini yanada oshiradi, — deydi Guliston davlat universiteti yoshlar yetakchisi Yorqinjon Hayitboyev. — Shuningdek, “Birinchi kurs maktabi” loyihasi doirasida “Kuningiz qanday oʻtdi?”, “Kelgusidagi rejalaringiz?”, “Yoshlar uchun imkoniyatlar” kabi mavzularda soʻrovnomalar ham oʻtkazilmoqda.

Ahmadali ShERNAZAROV

“Xalq soʻzi”.