Germaniya TIV rahbari Yoxann Vadeful Vashingtonga tashrifi chogʻida AQSHdan Yevropa Ittifoqi tovarlariga bojlarni bekor qilishni talab qildi. Bu haqda “Bild” nashri xabar qildi.

Vazir Vashingtonga amaliy tashrif bilan borib, AQSH davlat kotibi Marko Rubio bilan muzokaralar olib bordi. Uchrashuvning asosiy mavzusi prezident Donald Tramp 9-iyuldan boshlab joriy etishni rejalashtirayotgan Yevropa tovarlariga 50 foizlik bojlar haqida boʻldi. Vadeful bu choralardan voz kechishni talab qilgan.

“Biz yangi tarif toʻsiqlarini xohlamaymiz, barqaror hamkorlik va ishonch koʻpriklarini qurishga intilamiz. Bu Atlantika okeanining har ikki tomonida farovonlikni saqlash va iqtisodiy xavfsizligimizni mustahkamlashning yagona yoʻli”, — dedi u.

Shuningdek, kun tartibida Ukrainadagi urush va Rossiyaga qarshi sanksiyalar mavjud edi. Germaniya TIV rahbari Yevropa Moskvaga bosimni kuchaytirishini taʼkidladi.

“Germaniya zudlik bilan sulhga va mustahkam tinchlikka erishmoqchi. Buning uchun esa Rossiyaga bosim oʻtkazishda davom etish kerak”, dedi u.

Bundan tashqari, Vadeful Germaniya Isroilning xavfsizligi va mavjudligini himoya qilishini, biroq xalqaro huquqqa sodiqligi hamda Gʻazo sektoridagi odamlarning ayanchli taqdiriga befarq emasligini eslatgan.