Illyustrativ foto

Toshkentda fuqarolarni xorij davlatiga ishga yuborishni vaʼda qilgan shaxs qoʻlga olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar qildi.

Qayd etilishicha, Departamentning Yunusobod tumani boʻlimi tomonidan oʻtkazilgan tergovga qadar tekshiruvda “F.A.” MCHJ rahbari J.B. va menejeri A.A. (muqaddam sudlanganlar) fuqarolarni goʻyoki Germaniya davlatiga ishga yuborishi haqida internet ijtimoiy tarmoqlariga eʼlonlar joylashtirib, ushbu eʼlon boʻyicha murojaat qilgan 9 nafar fuqaro bilan soxta shartnomalar tuzib, ulardan jami 12 500 AQSH dollari va 73,2 million soʻm pullarni firibgarlik yoʻli bilan qoʻlga kiritganliklari aniqlangan.

Mazkur holat yuzasidan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qoʻzgʻatilib, tergov harakatlari oʻtkazilmoqda.

Avvalroq ham Toshkent shahri, Namangan, Fargʻona va Andijon viloyatlarida fuqarolarni xorijiy davlatlarga ishga yuborishni vaʼda qilgan shaxslar ushlangani toʻgʻrisida xabar qilgandik.