Vashingtonda Milliy gvardiyaning ikki nafar aʼzosi otib oʻldirilganidan keyin Tramp maʼmuriyati immigratsiyaga qarshi kurash choralarini keskin kuchaytirdi. Prezident Donald Tramp koʻrsatmasiga binoan, 19 mamlakatdan kelgan fuqarolarga berilgan yashil kartalar (Green Card) qayta koʻrib chiqiladi.

“Xavfli” deb hisoblangan davlatlar roʻyxatiga Markaziy Osiyodagi Turkmanistondan tashqari Afgʻoniston, Birma, Chad, Kongo Respublikasi, Ekvatorial Gvineya, Eritreya, Gaiti, Eron, Liviya, Somali, Sudan, Yaman, Burundi, Kuba, Laos, Serra-Leone, Togo va Venesuela kirgan.

Endilikda ushbu davlat fuqarolarini qabul qilishda har bir mamlakatga xos xavfsizlik omillari alohida hisobga olinadi.

Vashingtondagi otishma sodir etganlikda gumonlangan va qoʻlga olingan Rahmonulla Lakanval Afgʻoniston fuqarosi ekani maʼlum qilingan. Shu hodisadan soʻng Afgʻoniston fuqarolarining immigratsiya soʻrovlarini koʻrib chiqish jarayoni xavfsizlik tekshiruvlari qayta ishlab chiqilgunga qadar nomaʼlum muddatga toʻxtatildi.

Maʼlumotlarga koʻra, Lakanval avval AQSH hukumati, jumladan Markaziy razvedka boshqarmasi (CIA) bilan hamkorlik qilgan. 2021-yilda Afgʻonistonda AQSH kuchlariga yordam berganidan soʻng Baydenning “Ittifoqchilar, xush kelibsiz” operatsiyasi doirasida AQSHga kelgan. 2024-yilda boshpana soʻrab murojaat qilgan va Tramp maʼmuriyati uning ishini 2025-yil aprelida qayta koʻrib chiqqan.

Davlat departamenti maʼlumotiga koʻra, 2021-yil avgustida AQSH harbiylari Afgʻonistonni tark etganidan beri 190 mingdan ortiq afgʻon fuqarosi AQSHga koʻchib kelgan.