Joriy yilning 27-noyabr kuni Oliy Majlis Senatida sud hokimiyatining ochiqligi va chinakam mustaqilligini targʻib qilish maqsadida Ochiq eshiklar kuni oʻtkazildi.

Tadbirda Prezident Administratsiyasi masʼul xodimlari, Senat rahbariyati va aʼzolari, Oliy sud, Sudyalar oliy kengashi va Konstitutsiyaviy sud va Bosh prokuratura mutasaddilari, sudyalar, Qonunchilik palatasi deputatlari, huquqni muhofaza qiluvchi organlar xodimlari, Odil sudlov akademiyasi tinglovchilari, oliy yuridik taʼlim muassasalari professor-oʻqituvchilari va talabalari, shuningdek, sud faxriylari, advokatlar hamda fuqarolik jamiyati institutlarining boshqa vakillari ishtirok etdi.

Soʻzga chiqqanlar Oʻzbekiston Respublikasi Prezidentining 2025-yil 24-noyabrda qabul qilingan “Sudyalar hamjamiyati organlari faoliyatining samaradorligi va ochiqligini oshirish hamda sud mustaqilligi kafolatlarini yanada kuchaytirish chora-tadbirlari toʻgʻrisida”gi PF–227-sonli Farmonining mazmun-mohiyati haqida fikr bildirdi.

Taʼkidlanganidek, mamlakatimizda “inson qadri” tamoyili asosida olib borilayotgan keng koʻlamli islohotlarning muvaffaqiyati koʻp jihatdan odil sudlovni taʼminlashga bevosita bogʻliq. Shu nuqtai nazardan keyingi 9 yil davomida sud-huquq sohasining tashkiliy-huquqiy asoslarini butkul yangilash, sudyalik lavozimlariga nomzodlarni tayyorlash, tanlash va tayinlash, umuman, aholining odil sudlovga boʻlgan ishonchini yanada oshirish borasida keng koʻlamli chora-tadbirlar amalga oshirildi.

Sohaga oid 50 dan ortiq normativ-huquqiy hujjatlar qabul qilinib, sud tizimi faoliyatini tartibga soluvchi oid qonunlar islohotlarga mos ravishda qayta koʻrib chiqildi.

Tashkiliy jihatdan ham sud faoliyatida tub oʻzgarishlar amalga oshirildi. Xususan, maʼmuriy sudlar faoliyati yoʻlga qoʻyildi. Sudyalarning ixtisoslashuviga alohida eʼtibor qaratilmoqda. Qator huquqiy institutlar joriy etildi.

Sudlarning moliyaviy mustaqilligi yanada mustahkamlanib, ularning faoliyati faqat Davlat byudjetidan amalga oshirilishi belgilandi.

Sud organlari faoliyatida fuqarolar uchun soddalashtirilgan va qulay tartib-taomillar joriy etilmoqda. Sud tizimida “yagona darcha” prinsipi joriy etilib, ariza taalluqliligiga koʻra tegishli sudga koʻrib chiqish uchun oʻtkazilishi belgilandi.

Sud ishlarini koʻrishda tezkorlikni taʼminlash va protsessual muddatlarni tejash maqsadida sud majlislarini videokonferensaloqa rejimida oʻtkazish amaliyoti yoʻlga qoʻyildi.

Sud raislarining xalq deputatlari mahalliy Kengashlarga axborot taqdim etib borish amaliyoti bekor qilinib, sudlar oʻz faoliyati toʻgʻrisida ommaviy axborot vositalari orqali jamoatchilikni har chorakda xabardor qilib bormoqda.

Ushbu oʻzgarishlar sudyalarning masʼuliyatini oshirishga, ishlarning sifatli va oʻz vaqtida koʻrilishiga, fuqarolar ortiqcha ovoragarchiligining oldini olishga xizmat qilmoqda.

Shu bilan birga, bugun sud tizimi oldida yana qator yangi vazifalar turgani alohida qayd etildi.

Sudyalar hamjamiyati organlarining rolini oshirish, ochiq va shaffof mexanizmlar asosida sudlarni malakali kadrlar bilan toʻldirish, sudlarning chinakam mustaqilligini taʼminlash va boshqa yana bir qator masalalar Prezidentning yuqorida nomi tilga olingan farmonida nazarda tutilganligiga eʼtibor qaratildi.

Tadbir ishtirokchilari odil sudlovni amalga oshirish, sudlarning chinakam mustaqilligini taʼminlash yuzasidan oʻz fikrlarini bildirdi hamda “Inson qadri uchun” gʻoyasi asosida adolatli sud tizimini rivojlantirishda hamkorlik qilishga kelishib olindi.