Foto: Farg'ona viloyati hokimligi matbuot xizmati

Joriy yilda Fargʻona viloyat yuridik texnikumini 248 nafar bitiruvchi muvaffaqiyatli tamomladi. Bu yilgi tantanali bitiruv kechasi noanʼanaviy koʻrinishda oʻtkazildi. Chunki ushbu talabalar safida qoʻqonlik 65 yoshli talaba Avazbek aka Mazaidov ham bor. Qizigʻi shundaki, yuzlab talabalarni qutlagani ota-onalar tashrif buyurishgan boʻlsa, Avazbek akani esa nabiralari va farzandlari bu muvaffaqiyati bilan tabriklashdi.

— Yoshim 65 da. Qoʻqon shahar Oq oltin MFYda istiqomat qilaman. Hozirda xalq deputatlari Qoʻqon shahar Kengashi deputatiman, — deydi Avazbek Mazaidov. — Bir necha yil avval mahallada oqsoqol boʻlib ishlaganimda, minglab fuqarolarga huquqiy koʻmak juda zarurligini anglaganman. Oʻshanda oʻz mahallamda bepul yuridik maslahat beruvchi nodavlat tashkilot ochishni maqsad qilgandim. Yuridik texnikumni tamomlaganim ana shu maqsadlarimning debochasi. Bir oy avval mahallada mutlaqo bepul boʻlgan yuridik markaz ochdim. Shu qisqa muddatda esa boshiga ish tushgan, muammoli vaziyatda boʻlgan mahalladoshlarimning 20 nafariga huquqiy koʻmak koʻrsatdim.

Maʼlumot oʻrnida aytish mumkinki, 15 yil avval oʻz faoliyatini boshlagan Fargʻona yuridik texnikumi shu kungacha mehnat bozoriga 3 mingdan ortiq huquqshunos kadrlarni yetkazib berdi. Eʼtiborlisi, ularning 65 foizi ayni damda oʻz mutaxassisliklari boʻyicha faoliyat olib bormoqda.