2025-yilgi UI GreenMetric World University Rankings natijalariga koʻra Fargʻona davlat universiteti dunyoning eng barqaror oliy taʼlim muassasalari qatoridan joy oldi. Reytingda 105 davlatdan 1 745 ta universitet ishtirok etgan boʻlib, Fargʻona davlat universiteti jahon miqyosida 327-oʻrinni egalladi.

Xalqaro koʻrsatkichlar kesimida universitet “Energiya va iqlim oʻzgarishi” yoʻnalishida 36-oʻrinni, “Taʼlim va ilmiy tadqiqotlar” yoʻnalishida esa 79-oʻrinni qayd etdi. Mazkur natijalar FarDUning ekologik barqarorlik, ilmiy salohiyat va taʼlim sifati boʻyicha olib borayotgan izchil siyosatini tasdiqlaydi.

Shuningdek, Oʻzbekiston boʻyicha UI GreenMetric reytingiga kiritilgan 79 ta oliy taʼlim muassasasi orasida Fargʻona davlat universiteti umumiy natijalarga koʻra 2-oʻrinni egalladi. Milliy reytingda “Energiya va iqlim oʻzgarishi” yoʻnalishida 1-oʻrin, “Taʼlim va ilmiy tadqiqotlar” yoʻnalishida esa 2-oʻrin universitet hissasiga toʻgʻri keldi.

Taʼkidlash joiz, mazkur yutuqlar Fargʻona davlat universitetida barqaror rivojlanishga qaratilgan strategiya, iqlim oʻzgarishiga qarshi amaliy choralar, ilmiy-tadqiqot faoliyatini qoʻllab-quvvatlash hamda “yashil kampus” infratuzilmasini rivojlantirish borasida olib borilayotgan tizimli ishlarning mantiqiy natijasidir.