Foto: “Xalq soʻzi”

Birlashgan Millatlar Tashkilotining Oziq-ovqat va qishloq xoʻjaligi tashkiloti (FAO)ning AKIS boʻyicha xalqaro maslahatchisi, shuningdek, Gent universiteti (Belgiya) mutaxassisi va Qishloq xoʻjaligi tadqiqotlari boʻyicha doimiy qoʻmita (SCAR) aʼzosi Silviya Burssens Toshkent, Fargʻona, Andijon va Namangan viloyatlaridagi AKIS (Agricultural Knowledge and Innovations System — Agrar sohada bilim va innovatsiyalar tizimi) markazlari xodimlari uchun ikki kunlik trening oʻtkazdi.

Treningning asosiy maqsadi qishloq xoʻjaligi bilimlari va innovatsion tizimlari konsepsiyasi va yondashuvi haqida tushuncha berish, AKIS viloyat markazlari xodimlarini ushbu sohadagi ilgʻor xorijiy tajribalar bilan tanishtirish, ularning salohiyatini oshirish, shuningdek, “jonli laboratoriyalar”ning asosiy tamoyillarini qishloq xoʻjaligini raqamlashtirishning samarali vositasi sifatida koʻrib chiqishdan iborat.

— FAO taʼrifiga koʻra, AKIS — bu qishloq xoʻjaligi sohasidagi turli muassasalar koʻmagida innovatsiyalarni joriy etadigan ishtirokchilar (shaxslar, tashkilotlar, korxonalar) tarmogʻi. Toʻgʻri yoʻlga qoʻyilgan AKIS faoliyati tadqiqot va amaliyot oʻrtasidagi tafovutni bartaraf etishda muhim ahamiyatga ega, bu esa qishloq xoʻjaligini barqaror rivojlantirish uchun innovatsiyalarni joriy etishni tezlashtirishga imkon beradi. Bu jarayonda fermerlar asosiy rol oʻynaydi, chunki ular bu bilimlarning barchasini dalada qoʻllaydilar, — deydi AKIS xalqaro maslahatchisi Silviya Burssens. — AKIS samarali ishlashi uchun milliy, mintaqaviy va mahalliy darajada yaxshi tashkil etilgan boshqaruv va muvofiqlashtirish mexanizmlari zarur.

Treninglar davomida taʼkidlanganidek, “jonli laboratoriyalar”ning afzalligi shundaki, ular mahalliy yoki mintaqaviy kontekstda bir nechta ishtirokchilarni birlashtirish orqali interaktiv yangiliklarni targʻib qilishadi. “Jonli laboratoriyalar” qishloq joylarida raqamli transformatsiyani qoʻllab-quvvatlashda muhim rol oʻynaydi, chunki ular hamkorlik uchun haqiqiy platformani taqdim etadi, bu yerda manfaatdor tomonlar birgalikda innovatsion raqamli yechimlarni yaratish, sinab koʻrish va amalga oshirish uchun oʻzaro hamkorlik qilishlari mumkin. Shu bilan birga, “jonli laboratoriyalar” qishloq joylarining madaniy, ijtimoiy, iqtisodiy va geografik sharoitlarini hisobga olgan holda raqamli yechimlarni moslashtirishga imkon beradi.

Hozirgi kunda Fargʻona viloyatida asalarichilik va issiqxona xoʻjaligi boʻyicha ikkita “jonli laboratoriyalar” mavjud boʻlib, mashgʻulotlar davomida ularning faoliyati tahlil qilindi. Bundan tashqari, “jonli laboratoriyalar”ning keyingi moliyaviy barqarorligini taʼminlash uchun davlat-xususiy sheriklik imkoniyatlari koʻrib chiqildi.

Treninglar FAO va Oʻzbekiston Qishloq xoʻjaligi vazirligining “Qishloq xoʻjaligini raqamli transformatsiya qilish uchun zaruriy shart-sharoitlarni yaratish” loyihasi doirasida tashkil etildi. Loyiha 2023-yil mart oyida boshlangan va butun qishloq xoʻjaligi oziq-ovqat sektorini raqamli transformatsiya qilishga qaratilgan.