Foto: Prezident matbuot xizmati

Joriy yilning 18-sentyabr kuni Prezidentning “Yerga oid munosabatlarda korrupsiyaviy omillarni bartaraf etish mexanizmlarini yanada takomillashtirish boʻyicha qoʻshimcha chora-tadbirlar toʻgʻrisida”gi 287-sonli qarori qabul qilindi.

Qarorga koʻra, Kadastr agentligining “Ye-YER NAZORAT” tizimi davlat yer nazoratini yuritishning yagona elektron platformasi hisoblanadi.

2026-yil 1-yanvardan maxsus vakolatli davlat organlarining yer qonunchiligiga rioya qilmaslik, jumladan, yerlarni oʻzboshimchalik bilan egallash, ularga tegishli choralar koʻrishga oid vazifalari faqatgina “Ye-YER NAZORAT” tizimi orqali amalga oshiriladi.

Yerga oid huquqbuzarlik darajasiga koʻra hududlarni quyidagicha toifalarga boʻlish belgilandi:

• “qizil” toifadagi hudud – yer uchastkalaridan samarasiz foydalanish, yerlarni oʻzboshimchalik bilan egallash ehtimoli yuqori hududlar;

• “sariq” toifadagi hudud – yer uchastkalaridan samarasiz foydalanish, yerlarni oʻzboshimchalik bilan egallash ehtimoli oʻrta hududlar;

• “yashil” toifadagi hudud – yer uchastkalaridan samarasiz foydalanish, yerlarni oʻzboshimchalik bilan egallash ehtimoli past hududlar.

Bunda “qizil” toifadagi hududlarda maxsus dronlardan foydalangan holda har chorakda kamida 1 marotaba, “sariq” toifadagi hududlarda maxsus samolyot yordamida har 6 oyda kamida 1 marotaba monitoring kuzatuvlari olib boriladi.