Foto: Nazorat inspeksiyasi

Dubay shokoladi tarkibida inson salomatligi uchun xavfli bakteriyalar aniqlandi. Bu haqda Texnik jihatdan tartibga solish sohasida nazorat inspeksiyasi xabar berdi.

Maʼlum qilinishicha, inspeksiya tomonidan “Eco bozor”ning Beruniy filiali savdo nuqtalarida sotilayotgan “Fix dessert chocolatier” brendi ostidagi Dubay shokolad mahsulotlari ustidan nazorat xaridi amalga oshirilgan. Tanlab olingan mahsulotlar sifat koʻrsatkichlarini aniqlash maqsadida “OʻzTest” DM sinov laboratoriyasiga topshirilgan.

Bayonnoma natijalariga koʻra, mahsulot tarkibida quyidagi nomuvofiqliklar aniqlangan:

• Mezofil aerob va fakultativ anaerob bakteriyalar (MAFAM), shuningdek, achitqi zamburugʻlarning yuqori darajadagi mavjudligi;
• Koli guruhidagi bakteriyalar (BGKP) va “Salmonella 25 g” bakteriyasining mavjudligi, bu esa meʼyoriy hujjatlarda qatʼiyan taqiqlangan;
• Bunday koʻrsatkichlar inson salomatligi uchun xavfli boʻlib, ayniqsa allergik kasalliklarni keltirib chiqarishi mumkin.

Shuningdek, mahsulotning tashqi koʻrinishi ham texnik reglament talablariga javob bermasligi aniqlangan. Xususan, UzTR.490-022:2017-sonli “Oziq-ovqat mahsulotini tamgʻalash yuzasidan xavfsizligi toʻgʻrisida”gi umumiy texnik reglamentning tegishli bandlari talablari buzilgan.