Illyustrativ foto

Dori va tibbiy jihozlar boʻyicha guvohnomalarning amal qilish muddati 2026-yil 1-yanvaridan boshlab 5-yil etib belgilanadi. Bu haqda Adliya vazirligi xabar qildi.

2026-yilning 1-yanvaridan boshlab mahalliy va xorijiy ishlab chiqaruvchilar dori vositalarini davlat roʻyxatidan oʻtkazish va roʻyxatdan oʻtkazilganlik guvohnomasining amal qilish muddatini uzaytirish uchun “Zarur ishlab chiqarish amaliyoti – GMP” milliy sertifikatiga ega boʻlishi talab etiladi.

Shuningdek, dorilar va tibbiy jihozlarni davlat roʻyxatidan oʻtkazish natijalariga koʻra mahalliy va xalqaro ishlab chiqaruvchilar uchun amal qilish muddati 5-yil boʻlgan roʻyxatdan oʻtkazilganlik guvohnomasi beriladi.

Taʼkidlash joiz, mahalliy ishlab chiqaruvchilarga ilgari ushbu guvohnoma muddatsiz berilgan.

Tegishli farmon bilan tibbiy jihozlarni chakana realizatsiya qilish faoliyati uchun litsenziya talabi bekor qilinib, ushbu faoliyat vakolatli organni xabardor qilish orqali amalga oshiriladigan boʻldi.

Dori-darmon va tibbiy anjomlar ishlab chiqarish esa ushbu huquq egasining buyurtmasi asosida tegishli litsenziyaga ega boʻlgan ishlab chiqaruvchilar tomonidangina, shartnoma orqali amalga oshiriladi.

Avvalroq San-Fransiskodagi Kaliforniya universiteti neyrobiologlari qarish jarayonida asosiy rol oʻynaydigan oqsilni topishgani toʻgʻrisida xabar qilingandi.