Foto: Халқ сўзи

Avval xabar berilganidek, Iordaniyaning Amman shahrida boks boʻyicha oʻsmirlar va yoshlar oʻrtasidagi Osiyo chempionati musobaqalarida faol ishtirok etayotgan hamyurtlarimiz joriy yilning 13-mart kuni oʻsmirlar oʻrtasida 11 oltin, 6 ta kumush, 6 ta bronza bilan jami 23 medalga daʼvogarlik qilishib, umumjamoa hisobida birinchi oʻrinni egallashgandi.

Oradan bir kun oʻtib, 14-mart kuni boʻlib oʻtgan yoshlar oʻrtasidagi yakuniy bellashuvlarda ham bokschilarimiz 9 ta oltin, 10 ta kumush va 4 ta bronza medalini qoʻlga kiritib, boshqa davlatlar sportchilari orasida yetakchilikni saqlab qoldi. Umumiy natijalarga koʻra, bu galgi Osiyo chempionatiga tashrif buyurgan 49 nafar oʻzbekistonlik bokschilar turli darajadagi 46 ta medal sohibiga aylanishdi. Ushbu iqtidorli bokschilar orasida Toshkent viloyati Chinoz tumani xalq taʼlimi boʻlimi tasarrufidagi 1-IDUM oʻquvchisi Jafarbek Shaxbozov ham bor. U 70 kg vazn toifasidagi bellashuvda raqibi ustidan gʻalaba qozonib, oltin medalni qoʻlga kiritdi.

Osiyo chempionatida erishilgan quvonchli yutuqlar mamlakatimizda, jumladan, Toshkent viloyatida keyingi yillarda yoshlar va oʻsmirlarni sport musobaqalariga puxta tayyorlash natijasidir.