Фото: Халқ сўзи

Аввал хабар берилганидек, Иорданиянинг Амман шаҳрида бокс бўйича ўсмирлар ва ёшлар ўртасидаги Осиё чемпионати мусобақаларида фаол иштирок этаётган ҳамюртларимиз жорий йилнинг 13 март куни ўсмирлар ўртасида 11 олтин, 6 та кумуш, 6 та бронза билан жами 23 медалга даъвогарлик қилишиб, умумжамоа ҳисобида биринчи ўринни эгаллашганди.

Орадан бир кун ўтиб, 14 март куни бўлиб ўтган ёшлар ўртасидаги якуний беллашувларда ҳам боксчиларимиз 9 та олтин, 10 та кумуш ва 4 та бронза медалини қўлга киритиб, бошқа давлатлар спортчилари орасида етакчиликни сақлаб қолди. Умумий натижаларга кўра, бу галги Осиё чемпионатига ташриф буюрган 49 нафар ўзбекистонлик боксчилар турли даражадаги 46 та медаль соҳибига айланишди. Ушбу иқтидорли боксчилар орасида Тошкент вилояти Чиноз тумани халқ таълими бўлими тасарруфидаги 1-ИДУМ ўқувчиси Жафарбек Шахбозов ҳам бор. У 70 кг вазн тоифасидаги беллашувда рақиби устидан ғалаба қозониб, олтин медални қўлга киритди.

Осиё чемпионатида эришилган қувончли ютуқлар мамлакатимизда, жумладан, Тошкент вилоятида кейинги йилларда ёшлар ва ўсмирларни спорт мусобақаларига пухта тайёрлаш натижасидир.