Maktabgacha va maktab taʼlimi vazirligi tomonidan  Isteʼdodli yoshlarni qoʻllab-quvvatlash “Ulugʻbek” jamgʻarmasi bilan hamkorlikda tashkil etilgan”Mirzo Ulugʻbek” onlayn maktabining ochilish marosimi boʻlib oʻtdi.

Unda vazir oʻrinbosari Uzoqboy Begimkulov va Jamgʻarma raisi  Oqil Salimov ishtirok etib, onlayn maktabning ahamiyati va kutilayotgan natijalar haqida soʻz yuritishdi.  

Maʼlumot oʻrnida: onlayn maktab doirasida hozirda test-sinov tariqasida 3 ta togʻli va chekka hududdagi maktablar tanlab olindi. Bular Jizzax viloyati, Forish tumani 7-sonli, Samarqand viloyati Qoʻshrabod tumani 70-sonli va Surxondaryo viloyati Denov tumani 62-sonli maktablardir.

Mazkur maktablarda yuqori sinf oʻquvchilari matematika va ingliz tili fanlaridan qoʻshimcha taʼlim olishadi. 

Ushbu onlayn maktabni tashkil qilishdan maqsad Respublikaning chekka hududlari va togʻli joylarda taʼlim sifatini oshirish hamda ushbu hududlarda istiqomat qilayotgan isteʼdodli yoshlarni qoʻllab-quvvatlashdan iborat.

Mazkur loyiha test-sinov jarayonida ijobiy natijalar olingandan soʻng Respublikaning boshqa togʻli va chekka hududlaridagi taʼlim muassasalariga joriy etilishi rejalashtirilgan.