Mamlakatimiz elchixonasi tashabbusi bilan “Oʻzbekiston—Buyuk Britaniya: meva-sabzavot eksporti istiqbollari” mavzusida vebinar tashkil etildi.

Unda Oʻzbekiston—Buyuk Britaniya jamiyati, nufuzli “ThePackHub”, “Aerona” va “AKS Service” britan kompaniyalari rahbarlari, Oʻzbekiston Oʻsimliklar karantini va himoyasi agentligi mutasaddilari hamda milliy eksportyorlar ishtirok etdi.

Diplomatlar Oʻzbekistonda agrar sohani isloh qilish, qishloq xoʻjaligi mahsulotlari yetishtirish, qayta ishlash va eksport qilish boʻyicha olib borilayotgan islohotlar haqida aytib oʻtdilar. Oʻzbekistondan 80 ta davlatga 180 xil meva-sabzavotlar eksport qilinayotgani taʼkidlandi.

Bundan tashqari, Britaniya kompaniyalari tomonidan milliy tadbirkorlarga britan bozoriga Oʻzbekistondan meva-sabzavotlarni eksport qilish shartlari, qadoqlashga boʻlgan talablar va tovarga rasmiylashtirilishi kerak boʻlgan hujjatlar hamda bojxona bojlari haqida maʼlumot berildi.

“Aerona” kompaniyasi rahbari Tom Kouley Oʻzbekistonda yetishtirilayotgan mahsulotlar Britaniya bozorida raqobatbardosh ekanligini taʼkidladi.

Tadbir yakunida hamkorlikda Oʻzbekiston mahsulotlarini yirik “Tesco” va “Sainsburyʼs” savdo shoxobchalari orqali sotuvini yoʻlga qoʻyish toʻgʻrisida kelishib olindi.