Farzandlar sogʻlom oʻsishi uchun ularning toʻgʻri ovqatlanishi bilan birga, jismoniy faolligi muhim ahamiyatga ega.

Shu bois ota-onalar oʻgʻil-qizlari uchun sport toʻgaragi tanlashda ularning yoshi, boʻyi, jismoniy imkoniyatlari, xohishi va ayniqsa, mavjud kasalliklarini inobatga olishi zarur.

— Xususan, 3 yoshgacha boʻlgan bolalar bilan faqat badantarbiya mashqlari bajariladi, — deydi Sogʻliqni saqlash vazirligi boʻlim boshligʻi Barno Odilova. — 4-5 yoshli oʻgʻil-qizlarni esa avval gimnastik mashgʻulotlarda «toblab», tanasini chiniqtirish maqsadga muvofiq. Sababi bu yoshdan keyin suyakning qayishqoqligi kamayib, bola koʻpgina mashqlarni bajarishga qiynaladi.

Insonning asab tizimi asosan 5-6 yoshdan mustahkamlana boshlashini inobatga olsak, sport bilan shugʻullanish uchun bu palla eng maqbul davr hisoblanadi. Chunki bola bu vaqtda murabbiy bergan vazifalarni bajara oladigan yoshga yetadi.

6 yashar bolaning xohishiga koʻra istalgan sport toʻgaragiga berish mumkin. Ammo bu davrda ular uchun eng foydalilari — suzish, badiiy gimnastika va futbol.

Bolalarda koʻp uchraydigan skolioz kabi xavfli kasalliklarni 6-12 yoshgacha suzish, turnikda mashqlar bajarish va yengil atletika yordamida davolash mumkin. Koʻrish qobiliyati past oʻgʻil-qizlar esa 9-11 yoshda stol tennisi va katta tennis bilan faol shugʻullanishi lozim.

Salomatlik uchun barcha sport turi foydali boʻlsada, ulardan ayrimlarini maʼlum davrlarda cheklash maqsadga muvofiq.

Masalan, tanasining rivojlanishi kechikayotgan 12-14 yosh oraligʻidagi oʻgʻil-qizlarga karate, taekvondo, dzyudo kabi ogʻriq beruvchi usullarga boy sport turlari tavsiya etilmaydi. Aks holda bolaning boʻyi oʻsmay qolishi mumkin.

Xuddi shunday 9-12 yoshda ogʻir atletika bilan shugʻullanish ham maʼqul emas. Chunki bu bolaga «ogʻirlik» qilib, buyragi atrofini yogʻ qoplashiga olib keladi.