Birlashgan Millatlar Tashkilotining Oziq-ovqat va qishloq xoʻjaligi tashkiloti (FAO) Qishloq xoʻjaligi vazirligi, Maktabgacha va maktab taʼlimi vazirligi, Sogʻliqni saqlash vazirligi hamda mahalliy hokimiyat organlari bilan yaqin hamkorlikda “Maktablarda ovqatlanish tizimini sinovdan oʻtkazish orqali oziq-ovqat xavfsizligini oshirish va sogʻlom ovqatlanishni yaxshilashga koʻmaklashish” loyihasini amalga oshirdi.

Bugun poytaxtimizda mazkur loyihaning yakuniy seminari boʻlib oʻtdi. Tadbir loyiha doirasida erishilgan natijalarni sarhisob qilish, amaliy tajribalar va olingan saboqlarni muhokama etish, shuningdek Oʻzbekistonda maktablarda ovqatlanish tizimini barqaror rivojlantirish va kengaytirish imkoniyatlarini koʻrib chiqishga bagʻishlandi.

Tadbirda tegishli vazirlik va idoralar, mahalliy hokimiyat organlari, rivojlanish boʻyicha hamkorlar, ekspertlar, sinov-tajriba maktablari, ota-onalar va oʻquvchilar vakillari ishtirok etdi. Ishtirokchilar loyiha doirasida erishilgan natijalarni koʻrib chiqib, olingan tajribalar bilan oʻrtoqlashdilar hamda maktablarda ovqatlanish tizimini milliy miqyosda barqaror rivojlantirish va kengaytirish imkoniyatlarini muhokama qildilar.

Loyiha ishga tushirilganidan buyon FAO koʻmagida Oʻzbekiston maktablarida ovqatlanish muhiti mustahkamlandi. Xususan, oziq-ovqat xavfsizligi va ovqatlanish boʻyicha amaliyotlar takomillashtirildi, oʻquvchilar, oʻqituvchilar va maktab oshxonalari xodimlari uchun oʻquv va metodik materiallar ishlab chiqildi, axborot-targʻibot tadbirlari sinovdan oʻtkazildi hamda maktablarda sogʻlom ovqatlanish masalalari boʻyicha milliy muloqot qoʻllab-quvvatlandi. Loyiha milliy idoralar va sinov-tajriba maktablari bilan yaqin hamkorlikda amaliy yechimlarni sinovdan oʻtkazish hamda institutsional salohiyatni oshirishga qaratildi.

Seminar ochilishida FAO va hamkor vazirliklar vakillari xavfsiz, toʻyimli va barqaror maktab ovqatlanish tizimini taʼminlashda tarmoqlararo hamkorlik muhimligini taʼkidladilar. Shuningdek, loyiha taʼlim, sogʻliqni saqlash va oziq-ovqat tizimlari sohalaridagi milliy islohotlarga qoʻshgan hissasi qayd etildi hamda bolalar rivoji va oziq-ovqat xavfsizligini taʼminlashda maktablarda ovqatlanish tizimining muhim oʻrni yana bir bor tasdiqlandi.

“Mazkur loyiha doirasida maktablarda ovqatlanish tizimini takomillashtirish boʻyicha amaliy yondashuvlar sinovdan oʻtkazildi. Olingan tajriba maktablarda sogʻlom va xavfsiz ovqatlanishni rivojlantirishga qaratilgan keyingi qadamlar uchun muhim asos boʻlib xizmat qiladi,” — dedi FAO ning Oʻzbekistondagi vakili oʻrinbosari Sherzod Umarov.

Tadbir dasturida loyiha doirasida ishlab chiqilgan oʻquv materiallari, shuningdek tayyorlangan video va boshqa kommunikatsiya mahsulotlarining dastlabki namoyishi oʻrin oldi.