Bitcoin narxi shanba kuni keskin pasayib, 78 ming dollardan ham past darajaga tushdi. “Forbes”ning yozishicha, bu holat AQSHda foiz stavkalari boʻyicha kutilmalar qayta koʻrib chiqilayotgani hamda Prezident Donald Tramp tomonidan Kevin Uorshning Federal zaxira tizimi raisi lavozimiga nomzod sifatida koʻrsatilishi bilan bogʻlanmoqda.

30-yanvar, juma kuni Bitcoin taxminan 84 ming dollar atrofida baholangan boʻlsa, shanba kuni u keskin tushib, 77 900 dollargacha pasaydi. Bu soʻnggi 24 soat ichida 7 foizdan ortiq qiymat yoʻqotishni anglatadi. Maqola yozilgan paytda esa kurs 78 626 dollarni koʻrsatib turgan edi. Joriy daraja 2024-yilda Donald Tramp prezident etib saylangan davrda kuzatilgan koʻrsatkichlarga yaqinlashdi.

2025-yilning oktyabr oyida Bitcoin eng yuqori choʻqqisiga chiqib, 126 198 dollarga yetgan edi. Ammo shundan soʻng investorlar xavfli aktivlardan chekina boshlagani, shuningdek, Federal zaxira tizimining foiz stavkalari boʻyicha yoʻli noaniq boʻlib qolgani sababli kriptovalyuta narxi asosan pasayib bordi.

Bitcoin bilan birga butun kriptovalyuta bozori ham tushishni boshdan kechirmoqda. Coindesk maʼlumotlariga koʻra, soʻnggi bir hafta ichida Ethereum, BNB, XRP va Solana kabi yirik tokenlar kamida 10 foizga arzonlashgan. Ayni paytda oltin narxi hafta boshida rekord daraja — 5 300 dollardan oshgan boʻlsa-da, Uorsh nomzodi haqidagi xabarlardan soʻng u ham pasayishni boshladi. Bu AQSH dollarining mustahkamlanishi bilan bir vaqtga toʻgʻri keldi.

Tahlilchilarning fikricha, Kevin Uorshning nomzod sifatida ilgari surilishi kriptovalyutalar uchun salbiy omil boʻlishi mumkin. 10x Research asoschisi Markus Tilenga koʻra, Uorshning qatʼiy pul-kredit siyosati, yuqori real foiz stavkalari va likvidlikni cheklashga urgʻu berishi kriptovalyutalarni himoya vositasi emas, balki arzon pul siyosati tugaganda qadrsizlanadigan spekulyativ aktiv sifatida namoyon qiladi. Foiz stavkalari uzoq muddat yuqori saqlanishi kutilgan sharoitda investorlar odatda kriptovalyuta kabi xavfli aktivlardan chiqib, xavfsiz sarmoya turlariga oʻtishadi.