Bosh prokuratura huzuridagi Departament qalbaki aksiz markali alkogol mahsulotlarini sotuvga qoʻygan savdo doʻkonlarni fosh etdi. Bu haqda Departamentning matbuot xizmati xabar qildi.

Maʼlum qilinishicha, Departamentning Urgut tuman boʻlimi tomonidan oʻtkazilgan tergovga qadar tekshiruvda “F.B.” xususiy korxonasiga qarashli savdo doʻkonida kirim qilinmagan, sifatini tasdiqlovchi hujjatlari boʻlmagan 29 turdagi jami 384 dona qalbaki aksiz markali alkogol mahsulotlari sotuvga qoʻyilganligi aniqlangan. Qayd etilishicha, ushbu mahsulotlar ashyoviy dalil sifatida hujjatlashtirib olingan.

Xuddi shunday yana ikki holat Yangiyoʻl shahri va Shovot tumanida ham aniqlangan. Tezkor tadbirlarda “N.Sh.” MCHJ hamda “X.O.” xususiy korxonasiga qarashli alkogol mahsulotlari savdo doʻkonlarida turli nomdagi jami 394 dona qalbaki aksiz markali alkogol mahsulotlari sotuvga qoʻyilganligi aniqlanib, ushbu mahsulotlar ashyoviy dalil sifatida olingan.

“Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qogʻozlar yasash, ularni oʻtkazish) bilan jinoyat ishlari qoʻzgʻatilib, tergov harakatlari oʻtkazilmoqda”, deyiladi xabarda.

Avvalroq, roʻmolini yechmagan oʻquvchini urgan direktor jarimaga tortilgandi.