Buxoro xoni Abdulaziz Muhammadxon (1645 — 1681) koʻnglida Hofiz Sheroziy devonini chiroyli husnixatda koʻchirtirish istagi tugʻiladi. Bu murakkab yumushni bajarish oʻsha davrning mohir xattoti Hoji Yodgor zimmasiga yuklanadi.

Xattot ishga kirishadi. Sabr-toqat, qunt, yuksak mahorat va didni talab qiluvchi bu yumushni u yetti yil ichida ado etadi.

Ajdodlarimiz oʻsha zamonlarda ham xuddi hozirgidek qoʻni-qoʻshnichilik, birodarlik aloqalarini oʻrniga qoʻyishgan. Abdulaziz Muhammadxon qoʻshni Eron davlatiga elchilarini joʻnatar boʻladi-yu ushbu davlat hukmdori Shoh Sulaymon Safiyga atalgan qimmatbaho sovgʻalar qatoriga Hoji Yodgor tomonidan koʻchirilgan Hofiz Sheroziy devonini ham qoʻshadi.

Manbalarda aytilishicha, Shoh Sulaymon Safiyning koʻziga sovgʻalar orasidagi kitob choʻgʻdek koʻrinadi. Hukmdor xattotlik sanʼatining nozik namunasi sanalgan bu devonni qoʻliga olar ekan, unga “Bir necha mamlakat tuhfasiga teng xazina”, deya baho beradi.

Ha, kitob — bebaho xazina. U hech qachon oʻz qadru qimmatini yoʻqotmaydi. Biz davlatimiz rahbari tomonidan ilgari surilgan besh tashabbus doirasida oʻtkazilgan “Kitob — bilim manbai” deb nomlangan tadbirda talabalar ongu shuuriga yuqoridagiga oʻxshash hayotiy misollarni singdirishga harakat qildik. Boʻlgʻusi rus tili va adabiyoti fani mutaxassislarini milliy madaniyatimiz tarixiga oid ibratomuz misollar bilan “qurollantirish”ga intildik. Toki, ularning kitob oʻqishga boʻlgan ishtiyoqlari yana-da kuchaysin, bilimlariga bilim qoʻshilsin. Ertaga pedagog sifatida ish boshlaganlarida yoshlarni ham bahosi yoʻq xazina — kitobni qadrlashga undashsin.

Zamira SALIXOVA,
Buxoro davlat universiteti rus tili va adabiyoti kafedrasi oʻqituvchisi