Illyustrativ foto

AQSH prezidenti Donald Trampning Eron yadro dasturi boʻyicha siyosati AQSHda xavotir uygʻotmoqda. Bu haqda ekspertlarga tayanib “The New York Times” yozmoqda.

Nashrning taʼkidlashicha, Oʻmonda boʻlib oʻtadigan Eron — AQSH yadroviy kelishuvi boʻyicha muzokaralar “muhim muammolar va munosib ishonchsizlikka duch kelmoqda”.

“Men juda xavotirdaman. Tramp maʼmuriyati tomonidan qoʻllanilgan tahdid ostidagi bu muzokara taktikasi, Eronga nisbatan jiddiy siyosat oʻrnini bosa olmaydi”, — deydi Eron boʻyicha ekspert, Brukings institutining tashqi siyosat dasturi direktori Syuzan Maloni.

Oʻz navbatida, “Chatham House”ning Yaqin Sharq va Shimoliy Afrika dasturi direktori Sanam Vakil AQSH va Eron ayro yoʻlda ekanini va inqirozga yaqinlashib qolganini taʼkidladi.

Shu yilning 7-mart kuni Tramp Eron bilan yadro dasturi boʻyicha kelishuvga erishish istagini bildirdi. Shu oʻrinda u “yadroviy qurolga ega boʻlgan boshqa davlat” paydo boʻlishiga qarshi ekanini taʼkidladi.

Keyinchalik Oq uy rahbari davlatlar oʻzaro til topisha olmasa, Eronni “misli koʻrilmagan bombardimon qilish” bilan tahdid qildi.

Shu yilning 8-aprel kuni Oq uy matbuot kotibi Kerolin Levitt AQSH — Eron muzokaralari 12-aprel, shanba kuni boʻlib oʻtishini maʼlum qildi.

Oʻz navbatida, Eron oliy rahnamosi Oyatulloh Ali Xomanaiy AQSH prezidenti Donald Trampning tahdidli bayonotidan keyin mamlakat armiyasini jangovar shay holatga keltirdi.

Shu bilan birga Eron Iroq, Kuvayt, BAA, Qatar, Turkiya va Bahraynga AQSHning Eronga hujumini qoʻllab-quvvatlash, jumladan, amerikalik harbiylar tomonidan ushbu mamlakatlar hududidan foydalanish “dushmanlik harakati” sifatida baholanishi haqida ogohlantirgan.