Arxiv foto

AQSH Mudofaa vazirligi Amerika armiyasini sezilarli darajada qisqartirish imkoniyatini koʻrib chiqmoqda. Bu haqda “CNN” Pentagon tomonidan tayyorlangan hujjatlarga tayanib xabar bermoqda.

“Koʻrib chiqilayotgan rejalar orasida jangovar boʻlinmalarni birlashtirish, ehtimol, qoʻshma kuchlarni rivojlantirish va tayyorlash uchun masʼul boʻlgan idorani tugatish hamda AQSH qoʻshinlarining Yaponiyadagi mavjudligini kengaytirmaslik kiradi”, — deyiladi nashrda.

Taklif etilayotgan chora-tadbirlar Donald Tramp maʼmuriyatining federal hukumatni qisqartirish boʻyicha umumiy siyosatiga mos keladi. AQSH Mudofaa vaziri Piter Xegset taʼkidlaganidek, ularni bu chora-tadbirlarga ilhomlantirgan narsa Ilon Mask va uning Hukumat samaradorligi departamenti boʻlishi mumkin.

Ayni paytda AQSH Mudofaa vazirligining yillik byudjeti 800 milliard dollardan oshadi.

Avvalroq, Pentagon AQSH harbiy xizmatchilarining tashqi koʻrinishiga eʼtibor qaratgandi. Piter Xegsetning soʻzlariga koʻra, vazirlik amerikalik askarlarning jismoniy tayyorgarligi standartlarini keng koʻlamli koʻrib chiqadi.