Foto: РИА «Новости»

AQSH Davlat kotibi Entoni Blinkenning aytishicha, agar Xelsinki va Stokgolm tomonidan shunday toʻxtamga kelinsa, AQSH Finlyandiya va Shvetsiyaning NATOga aʼzo boʻlish tashabbusini qattiq qoʻllab-quvvatlaydi. 

“Albatta, biz ulardan bu boradagi qarorni kutamiz. Agar ular shunday qaror qabul qilsalar, biz buni har tomonlama qoʻllab-quvvatlaymiz”, deydi Blinken.

Uning taʼkidlashicha, bu sohadagi oʻzgarishlarni iyun oyi oxirida, Shimoliy Atlantika alyansining eng yuqori darajadagi navbatdagi yigʻilishi boʻlib oʻtadigan paytda kutish mumkin.

“Yaxshi bilasiz, NATO sammiti yaqinlashmoqda. Shu bois sammitgacha bu mavzu haqida koʻproq eshitamiz, deb umid qilaman”, deya qoʻshimcha qildi Blinken.

Shimoliy Atlantika alyansining yigʻilishi 29-30-iyun kunlari Ispaniyada boʻlib oʻtadi.

Avvalroq, Shvetsiya bosh vaziri Magdalena Andersson va tashqi ishlar vaziri Ann Linde hukumat mamlakatning Shimoliy Atlantika alyansidagi aʼzoligi boʻyicha referendum oʻtkazishga qarshi ekanini maʼlum qilgan edi.

Anderssonning soʻzlariga koʻra, bu masalada davlat xavfsizligiga taalluqli va maxfiylik sarlavhasi ostidagi maʼlumotlar juda koʻp, yaʼni uni muhokama qilib boʻlmaydi.