Фото: РИА «Новости»

АҚШ Давлат котиби Энтони Блинкеннинг айтишича, агар Хельсинки ва Стокгольм томонидан шундай тўхтамга келинса, АҚШ Финляндия ва Швециянинг НАТОга аъзо бўлиш ташаббусини қаттиқ қўллаб-қувватлайди. 

«Албатта, биз улардан бу борадаги қарорни кутамиз. Агар улар шундай қарор қабул қилсалар, биз буни ҳар томонлама қўллаб-қувватлаймиз», дейди Блинкен.

Унинг таъкидлашича, бу соҳадаги ўзгаришларни июнь ойи охирида, Шимолий Атлантика альянсининг энг юқори даражадаги навбатдаги йиғилиши бўлиб ўтадиган пайтда кутиш мумкин.

«Яхши биласиз, НАТО саммити яқинлашмоқда. Шу боис саммитгача бу мавзу ҳақида кўпроқ эшитамиз, деб умид қиламан», дея қўшимча қилди Блинкен.

Шимолий Атлантика альянсининг йиғилиши 29-30 июнь кунлари Испанияда бўлиб ўтади.

Аввалроқ, Швеция бош вазири Магдалена Андерссон ва ташқи ишлар вазири Анн Линде ҳукумат мамлакатнинг Шимолий Атлантика альянсидаги аъзолиги бўйича референдум ўтказишга қарши эканини маълум қилган эди.

Андерссоннинг сўзларига кўра, бу масалада давлат хавфсизлигига тааллуқли ва махфийлик сарлавҳаси остидаги маълумотлар жуда кўп, яъни уни муҳокама қилиб бўлмайди.