Kecha, 15-dekabr kuni APLning 16-turi doirasidagi soʻnggi oʻyin boʻlib oʻtdi. Unda “Manchester Yunayted” klubi oʻz maydonida “Bornmut”ni qabul qildi.

Uchrashuv 4:4 hisobidagi durang natija bilan yakunlandi. “Qizil iblislar” tarkibida gollarga Diallo, Kazemiro, Fernandesh va Kunya mualliflik qildi. “Bornmut”ning javob gollari esa Semenyo, Evanilson, Tavernye va Krupi hisobiga yozildi.

Shu tariqa jamoalar 16-tur oʻyinida 1 ochkodan ishlab oldi. Oʻyindan soʻng “Manchester Yunayted” ustozi Ruben Amorim quyidagi fikrlarni bildirib oʻtdi:

“Juda hayratdaman. Uchrashuv aqlbovar darajada boʻlib oʻtdi. Ikkinchi boʻlimda ikki ochko yoʻqotganimiz koʻringandek boʻlishi mumkin, biroq biz birinchi boʻlimning oʻzidayoq gʻalabani qoʻldan chiqargandik. Biz bugungi oʻyinimiz bilan koʻproq narsaga haqlimiz. Biz bunday oʻyinlarda gʻalaba qozonishni oʻrganishimiz kerak, chunki bu juda tez-tez sodir boʻladi. Bu jarayonning bir qismi. Biz hamma narsani qoʻlimizdan kelganicha qilishga harakat qilamiz, lekin baʼzida bu yetarli emas”, — dedi Amorim.

“Manchester Yunayted” — “Bornmut” 4:4

Gollar: Diallo 13, Kazemiro 45, Fernandesh 77, Kunya 79 — Semenyo 40, Evanilson 46, Tavernye 52, Krupi 84.

“Manchester Yunayted”: Lammens, Yoro, Xeven, Shou, Diallo, Kazemiro, Fernandesh, Dalot, Mbeumo, Maunt, Kunya.

“Bornmut”: Petrovich, Smit, Diakite, Senesi, Tryuffer, Tavernye, Adams, Ximenes, Klyuyvert, Semenyo, Evanilson.