Кеча, 15 декабрь куни АПЛнинг 16-тури доирасидаги сўнгги ўйин бўлиб ўтди. Унда «Манчестер Юнайтед» клуби ўз майдонида «Борнмут»ни қабул қилди.

Учрашув 4:4 ҳисобидаги дуранг натижа билан якунланди. «Қизил иблислар» таркибида голларга Диалло, Каземиро, Фернандеш ва Кунья муаллифлик қилди. «Борнмут»нинг жавоб голлари эса Семеньо, Эванилсон, Тавернье ва Крупи ҳисобига ёзилди.

Шу тариқа жамоалар 16-тур ўйинида 1 очкодан ишлаб олди. Ўйиндан сўнг «Манчестер Юнайтед» устози Рубен Аморим қуйидаги фикрларни билдириб ўтди:

«Жуда ҳайратдаман. Учрашув ақлбовар даражада бўлиб ўтди. Иккинчи бўлимда икки очко йўқотганимиз кўрингандек бўлиши мумкин, бироқ биз биринчи бўлимнинг ўзидаёқ ғалабани қўлдан чиқаргандик. Биз бугунги ўйинимиз билан кўпроқ нарсага ҳақлимиз. Биз бундай ўйинларда ғалаба қозонишни ўрганишимиз керак, чунки бу жуда тез-тез содир бўлади. Бу жараённинг бир қисми. Биз ҳамма нарсани қўлимиздан келганича қилишга ҳаракат қиламиз, лекин баъзида бу етарли эмас», деди Аморим.

«Манчестер Юнайтед» — «Борнмут» 4:4

Голлар: Диалло 13, Каземиро 45, Фернандеш 77, Кунья 79 — Семеньо 40, Эванилсон 46, Тавернье 52, Крупи 84.

«Манчестер Юнайтед»: Ламменс, Йоро, Хэвен, Шоу, Диалло, Каземиро, Фернандеш, Далот, Мбеумо, Маунт, Кунья.

«Борнмут»: Петрович, Смит, Диаките, Сенеси, Трюффер, Тавернье, Адамс, Хименес, Клюйверт, Семеньо, Эванилсон.