Kecha Angliya Premyer-ligasida 2-tur bahslari yakunlandi. Soʻnggi oʻyinda Arne Slot boshchiligidagi “Liverpul” jamoasi “Nyukasl” maydoniga safar qildi.

Uchrashuv amaldagi chempionning 2:3 hisobidagi gʻalabasi bilan yakunlandi. Oʻyinda hisob 35-daqiqada “mersisaydliklar”ning niderlandiyalik futbolchisi Rayan Gravenberx tomonidan ochildi. Ikkinchi taym boshida jamoaning yangi futbolchisi Yugo Ekitike hisobni 0:2 koʻrinishiga olib keldi.

Birinchi taym yakunida mezbonlar maydonda 1 kishi kam boʻlib qolishdi. Bosh hakam Simon Xuper “Nyukasl”ning markaziy hujumchisi Antoni Gordonni maydondan chetlatdi.

Lekin 1 kishi kam boʻlishiga qaramay, Eddi Xau shogirdlari hisobni tenglashtira oldilar. 57-daqiqada Brunu Gimarayesh, 88-daqiqada esa Villiyam Osula oʻz nomini tabloga yozdirishdi.

Ammo “Liverpul” hakam tomonidan ikkinchi boʻlimga qoʻshib berilgan 10-daqiqada gʻalabani ilib ketdi. Zaxiradan maydonga tushgan jamoaning 17 yoshli hujumchisi Rio Ngumoxa gol kiritib, oʻz jamoasiga gʻalabani tortiq qildi.

Shu tariqa “mersisaydliklar” 1 kishi kam boʻlib oʻynagan “Nyukasl” jamoasi maydonidan qiyin gʻalaba bilan qaytdi.