Ijtimoiy tarmoqlarda 28-iyul kuni Toshkentdagi Anhor parkida osmondan lentalar yogʻilishi haqida video tarqalgandi. Toshkent shahar Ekologiya, atrof-muhitni muhofaza qilish va iqlim oʻzgarishi boshqarmasi holatni nazoratga olganini maʼlum qildi.

Oʻrganishda parkdagi Amfiteatrda “lenta-shou” uyushtirilishi, bunda animatorlar lentalarni aylantirib, tomosha koʻrsatishi, osmondan lentalar yogʻdirishi aniqlangan.

Vazirlik tashkilotchilariga bu kabi shoular atrof-muhitning ifloslanishiga sabab boʻlishi, ekologiya uchun zararli ekanini tushuntirganini taʼkidlagan va “lenta-shou” bekor qilinib, blogerlar tomonidan tarqatilgan videolar oʻchirtirilgan.

Vazirlik xiyobonlar, dam olish maskanlari, koʻngilochar obyektlar mutasaddilarini yuqoridagi kabi atrof-muhitga zarar keltiradigan shoular oʻtkazmaslikka chaqirib, ekologiyaga yetkazilgan har qanday zarar uchun qonunda qatʼiy jazo belgilanganini eslatgan.