Angrenda iyul oyida jinsiy zoʻravonlik qurboni boʻlgan va hozirda Respublika ixtisoslashtirilgan tibbiyot markazida davolanayotgan 15 yoshli qizning sogʻligʻida ijobiy oʻzgarishlar kuzatilmoqda.

2025-yil iyul oyida angrenlik qiz bir necha marta (avval qarindoshi, keyin esa bir guruh yigitlar tomonidan) zoʻravonlikka uchragani haqida xabar berilgan edi.

Bolalar ombudsmani Surayyo Rahmonova 18-noyabr kuni shifoxonaga borib, uning holati bilan shaxsan tanishdi.

Bolalar ombudsmani maʼlum qilinishicha, qizning umumiy ahvoli barqarorlashgan, tana vazni oshgan va bosqichma-bosqich ruhiy inqiroz holatidan chiqib boryapti. Psixologlar tomonidan muntazam olib borilayotgan muolajalar ham foyda beryapti.

Qiz ota-onasi va yaqinlariga nisbatan emotsional munosabati, ishonch darajasi, kelgusida qaysi oilaviy muhitda yashashni istashi haqida fikrini bildirgan. Mutaxassislar uning travmatik holatdan toʻliq chiqishi uchun davolanishdan keyin xavfsiz va neytral muhitda yashagani maʼqul ekanligini bildirgan.

Bu ish boʻyicha tergov ishlari tugagan va toʻplangan materiallar sudga yuborilgan. Hozir sud muhokamasi davom etmoqda. Bolalar ombudsmani bu jarayonda qatnashishini va qizni xavfsiz muhitga joylashtirish boʻyicha nazoratni davom ettirishini maʼlum qildi.