Saminjon HUSANOV/“Xalq soʻzi”. Golland atirgullari dunyoga mashhur. Gul doʻkonlarning eng qimmatbaho rastalarida turadi. Gulchilar mehr bilan parvarishlaydi, sotuvchilarga yaxshigina daromad keltiradi.

Baliqchi tumanidagi “Chinobod nurli zamin” agrofirmasi ham kelgusida oʻz xoʻjaligini atirgul klasteriga aylantirish niyatida. Tuman hokimligi tomonidan 10 gektar yer maydoni ajratib berildi. Endi agrofirma 20 gektar yer maydoniga ega.

— Hovlimizdagi tomorqaga, uyimizga yaqin daladagi tutzor oraligʻiga atirgul koʻchatlarini ekib, daromad topardik, — deydi agrofirma rahbari Alisher Xoʻjamov. — 2015-yilda ushbu agrofirmani tashkil etdik. Dastlab koʻchat sotish bilan shugʻullangan boʻlsak, keyinchalik gul sota boshladik. Hozirga kelib yaproqlardan tayyorlangan sharbat ishlab chiqarishni ham yoʻlga qoʻyganmiz.

Ayni paytda xoʻjalikda 80 nafar yoshlar doimiy ish bilan taʼminlangan. Ularning samarali mehnatlari tufayli 500 turdan ziyod atirgullar mahalliy sharoitga moslashtirildi. Dastlab ichki bozor ehtiyoji qondirilgan boʻlsa, hozirda MDH davlatlariga bir yilda oʻrtacha 550 ming AQSH dollari miqdoridagi eksport faoliyati yoʻlga qoʻyildi. Tez orada atirgul sharbatini qadoqlash, yaproqlaridan parfyumeriya mahsulotlari ishlab chiqarish rejalashtirilgan.