Foto: Халқ сўзи

Davlatimiz rahbari qarori asosida Mudofaa vazirligi qoʻshinlarining jangovar tayyorgarligini oshirish va harbiy anʼanalarni yanada mustahkamlash maqsadida “Amir Temur jangovar bayrogʻi” uchun musobaqasi yoʻlga qoʻyilganidan xabaringiz bor.

14-yanvar – Vatan himoyachilari kuni arafasida Prezidentimiz Farmoni bilan Markaziy harbiy okrug qoʻshinlari qoʻmondoni Aybek Saidov “General-mayor” harbiy unvoni va “Amir Temur jangovar bayrogʻi” mukofoti bilan taqdirlandi va qoʻmondonga “Amir Temur jangovar bayrogʻi” topshirilgan edi.

Bugun ushbu bayroq Samarqandga olib kelindi. Dastlab Bulungʻur va Jomboy tumanlaridagi markaziy koʻchalarda, soʻng Samarqand shahridagi Koʻksaroy maydonida harbiylar, deputatlar, yoshlar, sportchilar va jamoatchilik vakillari ishtirokida “Amir Temur jangovar bayrogʻi” koʻtarinki ruhda kutib olindi.

Tadbirda Samarqand viloyat hokimi E.Turdimov ishtirok etib, Markaziy harbiy okrug qoʻshinlari qoʻmondonligi va barcha samarqandliklarni “Amir Temur jangovar bayrogʻi” qoʻlga kiritilgani bilan tabrikladi va bu barcha uchun gʻurur, iftixor ekanini taʼkidladi.

Tadbirdan keyin Amir Temur haykali oldida bayroq bilan esdalik suratlari tarixga muhrlandi va Registon maydonida harbiy parad tashkil etilib, shahar koʻchalari boʻylab “Amir Temur jangovar bayrogʻi” tantanali olib oʻtildi.

Ushbu tadbir yoshlarimizning buyuk ajdodlarimizga munosib mard va jasur, ona Vatanga sadoqat ruhida kamol topishi uchun xizmat qilishi bilan gʻoyatda ahamiyatlidir.

Abdulaziz Yoʻldoshev, “Xalq soʻzi”.