Alsgeymer kasalligining insondan insonga yuqishi bilan bogʻliq ilk holat aniqlandi

11:18 07 Fevral 2024 Dunyo
183 0

Tibbiyot tarixida ilk bor Alsgeymer kasalligining insondan insondan yuqishi bilan bogʻliq klinik holatlar aniqlandi. Bu, Buyuk Britaniya olimlari tomonidan oʻtkazilgan tadqiqot davomida maʼlum boʻldi. Mazkur patologiya 8 nafar bemorda qayd etildi.

Aslida, bu voqelikning ildizi ancha uzoq. Gap shundaki, oʻtgan asrning 60-80-yillarida Buyuk Britaniyada oʻlgan donorlar gipofiz bezidan olingan oʻsish gormoni bilan davolash usuli amaliyotda qoʻllanilgan.

Ammo vaqt oʻtib, ensefalopatiya, yaʼni, bosh miyada paydo boʻlgan nuqsonlar tufayli bemorlar orasida koʻp oʻlim holatlari kuzatildi. Oqibatda yangi terapiya usuliga taqiq qoʻyilib, ularning oʻrnini sintetik garmonlar egalladi.

Biroq oʻsha yanglish muolajalar tufayli 8 nafar bemorda 35-50 yoshida Alsgeymer kasalligining oʻziga xos belgisi boʻlgan beta-amiloid oqsili yuzaga kelgani aniqlandi. Vaholanki, ularda ushbu xastalikka mutlaqo moyillik boʻlmagan.

Buni olimlar 2017-2022-yillarda oʻtkazilgan tadqiqotlar davomida oʻrganishdi. Hozir ana shu 8 bemordan 3 nafari hayotdan koʻz yumgan.

Mutaxassislar xulosasiga koʻra, Alsgeymerning yuqishi virusli yoki bakterial infeksiyalar kabi kechmaydi. Bu patologiya faqat bemor donordan inson toʻqimalari (yoki uning ekstrakti) tasodifiy koʻchirib oʻtkazilgan hollardagina yuz berishi mumkin. Bunga zararlangan gipofiz bezi gormonlari sabab boʻladi.

Ekspertlar, yangi tadqiqot kasallikni yanada kengroq va chuqurroq oʻrganish imkonini beradi, degan xulosada.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?