Temur ESHBOYEV/“Xalq soʻzi”. Navbahor tumanida umumiy oʻrta taʼlim maktablarining direktor oʻrinbosarlari ularga ragʻbatlantirish pullari toʻlab berilmayotganligi yuzasidan tuman adliya boʻlimiga murojaat qilishdi.

Ushbu murojaatni oʻrganish davomida tumanda 2021-2022-oʻquv yilida erishilgan yutuqlariga asosan, maktablarning oʻquv ishlari boʻyicha direktor oʻrinbosarlariga mehnatga haq toʻlashning eng kam miqdorida natijalarga asosan belgilangan toʻlovlar toʻlab berilmaganligi oqibatida Navbahor tumani maktabgacha va maktab taʼlimi boʻlimida 125 million soʻm qarzdorlik aniqlandi.

— Respublikamiz Prezidentining “Oʻzbekistonning yangi taraqqiyot davrida taʼlim-tarbiya va ilm-fan sohalarini rivojlantirish chora-tadbirlari toʻgʻrisida”gi Farmoni bilan umumtaʼlim muassasalari bitiruvchilarining oliy hamda professional taʼlim tashkilotlariga oʻqishga kirish hamda ishga joylashish koʻrsatkichlari asosida direktor jamgʻarmasi mablagʻlari hisobidan umumtaʼlim muassasalari rahbar xodimlari mehnatga haq toʻlashning eng kam miqdorida ragʻbatlantirilishi belgilangan, — deydi Navbahor tumani adliya boʻlimi Inson huquqlarini himoya qilish va huquqni qoʻllash amaliyotini oʻrganish boʻlinmasi bosh maslahatchisi Sh.Sayfudinov. — Shu asosda tuman adliya boʻlimi tomonidan 24 nafar pedagogning manfaatini koʻzlab, fuqarolik ishlari boʻyicha Navbahor tumanlararo sudiga daʼvo tartibida ariza kiritdi. Sudning tegishli hal qiluv qarori bilan 24 nafar fuqaroning murojaatlari toʻliq qanoatlantirildi.

Adolat qaror topdi. Biroq bir savol qiynaydi. Nega adliya aralashgachgina qariyb toʻrt yil avvalgi qarz toʻlandi? Buning ortida mutasaddilarning mabodo xato qilgan boʻlsak, adliya va sud javob beradi, degan masʼuliyatdan qochish zohir emasmikin? Har holda oʻsha davrdagi ragʻbat pullari bilan hozir toʻlanganining qurbida anchagina farq bor.