Agar global isishga olib keladigan issiqxona gazlari chiqindilari hozirgi darajada saqlanib qolsa, 2100-yilga kelib Antarktida muz qoplami 25 foizga qisqarishi mumkin. Bu haqda Yaponiyaning Okean va Yer fanlari hamda texnologiyalari agentligi (JAMSTEC) tadqiqotchilari maʼlum qilishdi.

JAMSTEC hisobotida aytilishicha, Antarktidaning muz qoplami hozirda taxminan 12 million kvadrat kilometrni egallaydi. Olimlarning fikricha, muz 2016-yilda qisqara boshlagan. Tadqiqotchilar bu jarayonni sayyoradagi haroratning oshishi bilan bogʻlashadi.

JAMSTEC mutaxassislari atmosferadagi karbonat angidrid va metan konsentratsiyasi taʼsirida Antarktida muz qoplamidagi oʻzgarishlarning turli ssenariylarini oʻrganib, kompyuter modellashtirish ishlarini olib borishdi. Agar joriy emissiyalar bir xil boʻlib qolsa, 2100-yilga kelib karbonat angidrid miqdori hozirgi darajaga nisbatan bir yarim barobar ortadi. Shu sababli muz maydoni chorak qismga kamayishi mumkin.

Biroq, olimlarning fikricha, 2040-yilgacha atmosferaga issiqxona gazlari chiqindilarini cheklash boʻyicha samarali choralar koʻrilsa, muz qoplamining qisqarishini toʻxtatish mumkin. Bunday holda, muzning erishi tezligi sekinlashadi va kelajakda muz qoplamining maydoni barqarorlashadi.