Maʼlumki, “Texnopark – Qipchoq” metro bekatlari oraligʻidagi harakat shu yilning 18-oktyabr sanasida faoliyatini boshlashi xabar qilingandi. Biroq, ushbu muddat yana uzayib, metro bekatlari 1-noyabr sanasi atrofida ochilishi kutilmoqda. Bu haqida “Toshkent metropoliteni” xabar berdi

14 ta bekatdan iborat “Texnopark – Qipchoq” bekatlari oraligʻida yerusti halqa yoʻli yoʻnalishida olib borilgan rejali profilaktika ishlari doirasida metro poyezdlar harakati vaqtincha toʻxtatilgan edi.

Xabarda aytilishicha, hozirda ushbu bekatlar oraligʻida keng koʻlamli tekshiruvlar oʻtkazilib, aniqlangan bir qator kamchiliklar bartaraf etilgan.

Jumladan, yoʻl holatlari toʻgʻrilanib, nosoz shpallar almashtirilgan. Shuningdek, drenaj tizimi holati oʻrganilgan hamda shagʻallar tekshiruvdan oʻtkazilgan.

“Avvalroq ushbu yoʻnalishning taxminan 18-oktyabrda faoliyatini qayta boshlashi mumkinligi haqida maʼlumot berilgan edi. Biroq, sinov jarayonlarini yanada takomillashtirish hamda kelgusida poyezdlar harakatini oldingiga nisbatan ikki barobar tezlashtirish, shuningdek oraliq vaqt intervallarini maksimal darajada qisqartirish maqsadida joriy yilning 1-noyabr sanasi atrofida ochilishi kutilmoqda. Hozirgi paytda ushbu yoʻnalishda poyezdlar sinov tariqasida (yoʻlovchilarsiz) harakatlanmoqda”, — deyiladi “Toshkent metropoliteni” xabarida.