Foto: dzen.ru

Oʻzbekiston Respublikasi Oliy Majlisi Qonunchilik palatasining navbatdagi majlisida qishloq xoʻjaligiga moʻljallangan yer uchastkalarini ijaraga berish tartibini takomillashtirishga qaratilgan qonun loyihasi ikkinchi oʻqishda koʻrib chiqildi. Bu haqda palataning matbuot xizmati xabar berdi.

Qonun loyihasiga koʻra, Yer kodeksi, “Ijara toʻgʻrisida”gi va “Fermer xoʻjaligi toʻgʻrisida”gi qonunlarga tegishli oʻzgartirish va qoʻshimchalar kiritiladi. Xususan, Yer kodeksining yer uchastkasi ijarasi toʻgʻrisidagi 24-moddasiga oʻzgartirish kiritilib, qishloq xoʻjaligiga moʻljallangan yer uchastkalarini elektron onlayn-auksion savdolari orqali ijaraga berish belgilanmoqda.

Bundan tashqari, qishloq xoʻjaligiga moʻljallangan yer uchastkalari ijarachilariga ijaraga berilgan yer uchastkalari boʻyicha oʻz huquq va majburiyatlarini boshqa shaxsga oʻtkazishga, yaʼni qayta ijaraga berishga ruxsat etilishi ham mumkin.

Ushbu qonun loyihasida keltirilishicha, yer uchastkasini ijaraga olish huquqi kredit olish uchun garovga qoʻyilgan va kredit majburiyati bajarilmagan taqdirda, kreditorlar tomonidan mazkur yer uchastkalariga boʻlgan ijara huquqini yerdan foydalanish maqsadini oʻzgartirmagan holda onlayn-auksion orqali realizatsiya qilish tartibi joriy etiladi.

Shuningdek, deputatlar qonun loyihasining qabul qilinishi bilan qishloq xoʻjaligiga moʻljallangan yer uchastkalarini jismoniy va yuridik shaxslarga berishda turli bahsli mezonlarga tayangan ochiq elektron tanlov oʻrniga shaffof va bozor tamoyillariga asoslangan elektron onlayn-auksion savdolari joriy etilishini qayd etishgan.

Avvalroq, agarda 48 soat ichida yoʻl harakati qoidabuzarliklari qaydnomasi kelmasa, jarima bekor qilinishi haqidagi qonun loyihasi uchinchi oʻqilishda deputatlar tomonidan tasdiqlangandi.