Фото: dzen.ru

Ўзбекистон Республикаси Олий Мажлиси Қонунчилик палатасининг навбатдаги мажлисида қишлоқ хўжалигига мўлжалланган ер участкаларини ижарага бериш тартибини такомиллаштиришга қаратилган қонун лойиҳаси иккинчи ўқишда кўриб чиқилди. Бу ҳақда палатанинг матбуот хизмати хабар берди.

Қонун лойиҳасига кўра, Ер кодекси, «Ижара тўғрисида»ги ва «Фермер хўжалиги тўғрисида»ги қонунларга тегишли ўзгартириш ва қўшимчалар киритилади. Хусусан, Ер кодексининг ер участкаси ижараси тўғрисидаги 24-моддасига ўзгартириш киритилиб, қишлоқ хўжалигига мўлжалланган ер участкаларини электрон онлайн-аукцион савдолари орқали ижарага бериш белгиланмоқда.

Бундан ташқари, қишлоқ хўжалигига мўлжалланган ер участкалари ижарачиларига ижарага берилган ер участкалари бўйича ўз ҳуқуқ ва мажбуриятларини бошқа шахсга ўтказишга, яъни қайта ижарага беришга рухсат этилиши ҳам мумкин.

Ушбу қонун лойиҳасида келтирилишича, ер участкасини ижарага олиш ҳуқуқи кредит олиш учун гаровга қўйилган ва кредит мажбурияти бажарилмаган тақдирда, кредиторлар томонидан мазкур ер участкаларига бўлган ижара ҳуқуқини ердан фойдаланиш мақсадини ўзгартирмаган ҳолда онлайн-аукцион орқали реализация қилиш тартиби жорий этилади.

Шунингдек, депутатлар қонун лойиҳасининг қабул қилиниши билан қишлоқ хўжалигига мўлжалланган ер участкаларини жисмоний ва юридик шахсларга беришда турли баҳсли мезонларга таянган очиқ электрон танлов ўрнига шаффоф ва бозор тамойилларига асосланган электрон онлайн-аукцион савдолари жорий этилишини қайд этишган.

Аввалроқ, агарда 48 соат ичида йўл ҳаракати қоидабузарликлари қайдномаси келмаса, жарима бекор қилиниши ҳақидаги қонун лойиҳаси учинчи ўқилишда депутатлар томонидан тасдиқланганди.