АҚШ етакчиси Жо Байден президентлик пойгасидан чиққанидан буён биринчи марта нутқ сўзлади. У ўзи эришган ютуқлар, камтарлиги ҳақида гапирган. Байденнинг айтишича, Америка демократиясининг келажаги уларнинг қўлида.

Оқ уй раҳбари ўз нутқида овоз беришга бир неча ой қолганида нега қайта сайланишдан воз кечганига атрофлича изоҳ бермаган.

«Сўнгги ҳафталарда мен ўз партиямни бирлаштиришим кераклиги аён бўлди. Машъалани янги авлодга топшириш вақти келди. Демократиямизни сақлаб қолиш йўлида ҳеч нарса тўсқинлик қила олмайди. Ҳатто шахсий амбициялар ҳам», деди Байден ўз чиқишида.

Оммавий ахборот воситаларига кўра, жаноб Байденнинг нутқи ўз вице-президентига қилинган танқидларни рад этиш ва ўзининг президентлик вазифаларини бажаришда давом этиши мумкинлигини кўрсатиш учун яхшигина имконият ҳисобланади.

Нутқининг охирида президент ўзининг номзоди ҳақида гапирар экан, Харрисни тажрибали, қаттиққўл, қобилиятли ва мамлакат учун керакли етакчи эканлигини қўшимча қилган.

Жо Байден ўтган ҳафта коронавирусга чалинган эди. У Делавердаги уйида даволаниб, сешанба куни Оқ уйга қайтганди.