Сурхондарё вилоятига хос бетакрор миллий таом — “Жарқўрғон тандир гўшти” энди расман географик кўрсаткич сифатида давлат рўйхатидан ўтказилди.

Бу Сурхондарёнинг ўзига хос таом маданиятини сақлаб қолиш ҳамда “Жарқўрғон тандир гўшти”ни миллий брэнд даражасига кўтариш сари қадам бўлди.

Ушбу таомнинг ўзига хослиги унинг тайёрланиш жараёнида намоён бўлади. Таом ҳисори зотли қўзи гўштидан, арча шохларида ёндириладиган, қарийб 400 даражадаги иссиқлик ҳароратда қиздирилган ер тандирда, тахминан 1,5-2 соат давомида буғ ва иссиқликда пухта пиширилади. Бу жараён таомга ўзига хос ҳид, ранг ва маза бағишлайди.

Маҳсулотнинг географик кўрсаткич сифатида рўйхатдан ўтказилиши “Жарқўрғон тандир гўшти” номи ва тайёрланиш усулини ҳуқуқий ҳимояга олади. Унинг сифат ва стандартларни белгилайди. Бу эса Сурхондарёнинг ҳудудий гастрономик обрўсини кенг тарғиб этиш имконини яратади.

Маълумот учун: географик кўрсаткич — бу муайян ҳудудда ишлаб чиқариладиган маҳсулотнинг табиий, иқлимий ва маданий хусусиятларини ифода этувчи, унинг сифат ва нуфузини кафолатлайдиган интеллектуал мулк объекти ҳисобланади.

Фарҳод ЭСОНОВ

(«Халқ сўзи»).