Украина Президенти Владимир Зеленский маълум қилишича, агар 20 банддан иборат якуний тинчлик режаси ҳудудий масала бўйича ўта мураккаб қарорни талаб этса, энг мақбул йўл сифатида уни умумхалқ референдумига қўйиш мумкин. Бу ҳақда Axios хабар берди.

Украина раҳбарининг сўзларига кўра, Россия камида 60 кун муддатга ўт очишни тўхтатишга розилик билдирса, у тинчлик режасини референдумга чиқаришга тайёр.

«АҚШ ва Украина ўртасидаги икки томонлама келишувларнинг кўплаб жиҳатлари аллақачон аниқланган. АҚШ бизга 15 йиллик хавфсизлик кафолатларини таклиф қилди ва бу келишувни кейинчалик узайтириш мумкин. Бироқ бизга 15 йилдан кўпроқ муддат керак. Умид қиламанки, Трамп бунга рози бўлади. Мен ҳудудлар бўйича янада мақбул шартларга келишишни истайман. Агар қарор жуда мураккаб бўлса, тинчлик режасининг барча 20 бандини референдумга қўйишга тайёрман», — деди Зеленский.

Axiosʼнинг ёзишича, АҚШ Зеленскийнинг референдум ўтказишга тайёрлигини муҳим илдамлашув сифатида баҳоламоқда. Шу билан бирга, Украина президенти овоз беришни ташкил этиш жиддий сиёсий хавфлар ва хавфсизлик таҳдидлари билан боғлиқ эканини таъкидлаб, уни ўтказиш учун камида 60 кунлик ўт очишни тўхтатиш зарурлигини билдирди.

«Агар референдум Россия ҳужумлари давом этаётган шароитда ўтказилса, одамлар ракеталарни кўради ва овоз беришга чиқмайди. Бу ҳолда натижалар ноқонуний деб баҳоланади. Одамларни овоз бериш имкониятидан маҳрум қилган ҳолда референдум ўтказгандан кўра, уни умуман ўтказмаган маъқул. Шунинг учун Россия камида 60 кунга ўт очишни тўхтатишга рози бўлиши керак», — деди Зеленский.

Қайд этилишича, Дональд Трамп ва Владимир Зеленский ўртасидаги музокаралар 28 декабрь куни Флорида штатидаги Мар-а-Лаго қароргоҳида ўтказилиши режалаштирилган.