Фото: AFP

Украина президенти Владимир Зеленский АҚШ президенти Жо Байденни Россия ҳудудига зарба беришга қўйилган ҳар қандай тақиқни бекор қилишга чақирди. Бу ҳақда «Neue Zürcher Zeitung» нашри ёзмоқда.

Нашрга кўра, у Байдендан Россия ҳудудидаги ҳарбий нишонларга Ғарб қуроллари билан ҳужум қилиш учун барча чекловларни олиб ташлашни талаб қилган.

Мақолада Зеленский Украина бу қадамни кутаётгани қўшимча қилинган. Изоҳланишича, Россия ҳудудига «чуқур зарбалар»сиз Киев ҳеч нарса қила олмайди.

Яқинда бир қанча Ғарб давлатлари Киевга ўз қуроллари билан у ёки бу шаклда Россия ҳудудига зарбалар беришга рухсат берди. Хусусан, бу ҳақда яқин вақтгача Буюк Британия бош вазири лавозимида ишлаган Риши Сунак ва унинг ҳукуматида Мудофаа вазири Грант Шаппс айтиб ўтганди.

Шу йилнинг июнь ойи бошида Россия президенти Владимир Путин Москва Украинага узоқ масофага учувчи қуроллар етказиб берилишига ассиметрик жавоб бериши мумкинлигини айтган эди. Унинг сўзларига кўра, Россия ўз қуролларини Киевни таъминловчи давлатларнинг нозик объектларига ҳужумлар уюштирилиши мумкин бўлган ҳудудларга ўтказиш имкониятини кўриб чиқади.