Парламент депутатлари заргарлик саноатини янада ривожлантиришга қаратилган қонун лойиҳасини биринчи ўқишда концептуал жиҳатдан кўриб чиқиб, қабул қилди.

Ушбу қонун лойиҳаси заргарлик буюмларини ишлаб чиқарувчиларнинг қимматбаҳо металларга бўлган талабини қондириш, уларнинг ривожи учун қулай бизнес муҳитини яратиш ва қонунчиликда мавжуд бўлган бюрократик тўсиқларни либераллаштиришга қаратилган.

Лойиҳа билан 2027 йил 1 сентябрга қадар “Ўзбекзаргарсаноати” уюшмасига аъзо бўлган заргарлик буюмларини ишлаб чиқарувчи тадбиркорларни мол-мулк ва ер солиғидан озод этиш белгиланмоқда.

Аффинаж корхоналарига қимматбаҳо металларни заргарлик буюмлари ишлаб чиқарувчиларига қулай шакл ва миқдорда сотиш, қимматбаҳо металлардан сувенир тангалар тайёрлаш ҳамда реализация қилиш ҳуқуқини бериш назарда тутилмоқда.

Заргарлик буюмлари ишлаб чиқарувчиларга ҳам ўз навбатида ўзлари ясаган заргарлик буюмларининг хомаки маҳсулотларини бошқа ишлаб чиқарувчиларга реализация қилиш мумкин бўлади.

Юридик ва жисмоний шахслардан қимматбаҳо металларни ва заргарлик буюмларини сотиб олиш фаолияти ваколатли органни хабардор қилиш тартибида амалга ошириши белгиланмоқда.

Бундан ташқари, қонун лойиҳаси билан хорижда ишлаб чиқарилган қимматбаҳо металлардан ва қимматбаҳо тошлардан ясалган заргарлик ва бошқа буюмларни божхона тўловлари тўланганини тасдиқловчи ҳужжатларсиз сотувга қўйиш ҳамда чакана савдода реализация қилиш тақиқланмоқда.