Россиялик мухолифатчи сиёсатчи Алексей Навалнийнинг беваси Юлия Навалная турмуш ўртоғи 2024 йил февралда колонияда заҳарланганини билдирди. Унинг сўзларини BBC келтирган.

Навалнаяга кўра, бу хулосага икки хорижий лаборатория хулосалари асосида келинган.

«Февралда биз Алексейнинг биологик материалларини олиб, хорижга чиқаришга ва лабораторияга топширишга муваффақ бўлдик. Орадан бир неча ой ўтиб, икки мамлакатнинг лабораториялари мустақил равишда бир хил хулосага келишди: Алексей заҳарланган. Россия фуқароси Россия ҳудудида ўлдирилди. Ҳамма далиллар шу ерда. Ғарб давлатларида жиноят ишини очиш учун ҳуқуқий асос йўқ», — деди у.

Навалная турмуш ўртоғи қай тарзда заҳарлангани ҳақидаги таҳлил натижалари ошкор этилишини талаб қилди. Ҳозирча бу лабораториялар номи ва тадқиқот натижалари эълон қилинмаган.

Унинг қўлида Хорпдаги «Полярный волк» колониясида ишлайдиган беш ходимнинг кўрсатмалари бор. Уларнинг айрим баёнотларига кўра, 3 февралда Навалнийнинг оёғида оғриқ бошланган, шифокорлар босим ва ҳароратини ўлчаб, лекин бошқа чора кўрмаган. 14 февралда у жазо изоляторига кўчирилган. 16 феврал куни эрталаб у яна оғриқдан шикоят қилган.

Навалнаянинг айтишича, колония ходимлари унинг соғлиғидан шикоят қилганини тасдиқлаган, аммо шифокорлар раҳбари Алексей Лисюк «ҳеч қандай шикоят бўлмаган» деган.

Гувоҳларнинг кўрсатмаларига кўра, Навальнийнинг аҳволи 16 феврал кундузи ҳаво сайри пайтида ёмон бўлган. У эшикни тақиллатиб, ўзини ёмон ҳис қилаётганини айтган. Камерага олиб кирилгандан сўнг ётоққа ётиб, оғриқдан нолий бошлаган, кўкраги ва қорни ёниб турганини айтган. Кейин қусиш бошланган, танасида тиришиш ва конвульсиялар кузатилган.

Юлия Навалнаянинг таъкидлашича, уни камерада ёлғиз қолдиришган. Бир ходим унинг азобланишини тор тешик орқали кузатиб турган. Фақат 40 минутдан сўнг тез ёрдам чақирилган.

Кардиограмма пайтида Навалнийнинг юрак фаолияти аллақачон сусайгани аниқланган. Етиб келган тез ёрдам ҳам уни қутқара олмаган. Соат 14:17 да юрак фаолияти тўхтагани қайд этилган, 14:23 да реанимация чоралари тўхтатилган.

Тиббий хулосада «тўсатдан ўлим синдроми» қайд этилган. Навалнаянинг айтишича, судирги заҳарланишга ишора қилиши мумкин.

Шу билан бирга, Навалная Навальнийнинг охирги кунидан видеоёзувлар йўқлиги шубҳали эканини таъкидлади. «Уч ярим йил давомида уни доимий равишда кузатишган, аммо охирги куннинг видеоси мавжуд эмас», — деди у.

Эслатиб ўтамиз, 2023 йил августида Москва шаҳар суди Алексей Навалнийни «экстремизм» айблови билан 19 йилга қатъий тартибдаги колонияга ҳукм қилган эди. 2024 йил 16 февралда сиёсатчи Хорпдаги «Полярный волк» колониясида вафот этган.