Япониялик мутлақ чемпион Наоя Иноуэнинг навбатдаги икки жанги расман тасдиқланди. «The Ring» нашрининг хабарига кўра, Иноуэнинг промоутерлари америкалик Рамон Карденас ва ўзбекистонлик Муроджон Аҳмадалиев билан жанг ўтказиш бўйича келишувга эришган.

Томонларнинг розилигига қарамасдан, ушбу жанг содир бўлиши бир шартнинг бажарилишига боғлиқ. Ушбу келишувга биноан, Иноуэ аввал 4 май куни Лас-Вегасда Карденас билан рингга чиқади. Агар ушбу жангда ғалаба қозонса, 14 сентябрь куни Токиода Аҳмадалиевга қарши жанг қилади.

Муроджон Аҳмадалиев айни пайтда WBA вақтинчалик чемпионлик камарига эга ва узоқ вақтдан бери Иноуэ билан жанг қилишни талаб қилиб келмоқда. Агар япон «самурайи» ҳамюртимизга қарши рингга чиқишдан бош тортганда, WБА ташкилоти ундан чемпионлик камарини олиб қўйиши мумкин эди. Айнан шу сабабли Аҳмадалиевнинг промоутери Эдди Хирн ва менежери Вадим Корнилов Иноуэнинг жамоаси билан музокаралар олиб бориб, жанг ташкил этилишига эришди.

Аҳмадалиев бу жангни узоқ кутганини ва Иноуэнинг ундан қочаётганини бир неча бор таъкидлаган, бироқ «The Monster» лақабли япониялик чемпион бу даъволарни рад этиб келаётганди.

Агар Наоя Иноуэ Аҳмадалиевни мағлуб этса, у декабрь ойида Саудия Арабистонидаги «Riyadh Season» мусобақасида навбатдаги жангини ўтказиши режалаштирилган. Аҳмадалиев эса ушбу имкониятдан фойдаланиб, дивизионнинг мутлақ чемпиони бўлишни мақсад қилган. Ҳамюртимиз учун бу жанг унутилмас фурсат бўлиши мумкин, чунки у Иноуэни мағлуб этиш орқали бутун дунё эътиборини ўзига қаратиши мумкин.