Абдулазиз ЙЎЛДОШEВ/«Халқ сўзи». Пайариқ туманидаги Гўзал маҳалласида «Тез тиббий ёрдам» биноси фойдаланишга топширилди. Мазкур янги объект «Ташаббусли бюджет» лойиҳаси асосида 1 миллиард 100 миллион сўм маблағ эвазига қуриб битказилди.

Самарқанд туманида ҳам «Тез тиббий ёрдам станцияси» ўз фаолиятини бошлади. Ушбу объектда ҳам «Ташаббусли бюджет» лойиҳаси асосида 1 миллиард 350 миллион сўм маблағ эвазига барча шароитлар яратилди.

Бугунги кунда 9 та шохобчадан ташкил топган туман «Тез тиббий ёрдам станцияси» 272 минг аҳолига тиббий хизмат кўрсатиб келмоқда. Бунда 22 та гуруҳ бўлиб, шундан 16 та врачлик пости, 5 та фельдшерлик пости ва 1 та махсус психиатрик бўлимлари мавжуд.

Мазкур янги объектларнинг очилиш маросимида Соғлиқни сақлаш вазирлиги ва вилоят бошқармаси масъуллари, туман ҳокимликлари, сектор раҳбарлари ҳамда кенг жамоатчилик вакиллари қатнашди. Иштирокчилар янги биноларда яратилган шароитлар билан танишди.