Саминжон ҲУСАНОВ/«Халқ сўзи». Хўжаобод туманида фаолият олиб борувчи «ФайзМ» масъулияти чекланган жамияти Булоқбоши туманида янги тикув корхонасини ишга туширди. Бунинг натижасида 1000 та янги иш ўрни яратилди.

— Корхонамиз 2016 йилда ташкил топган бўлиб, ўша пайтда жамоамиз 200 кишидан иборат эди, — дейди корхона таъсисчиси Фарҳоджон Зокиров. — Айни пайтда 2 минг кишидан иборат кластерга айландик. Бу мамлакатимизда тадбиркорларга яратилган қулай имконият ва шароитлар маҳсулидир.

Бугунги кунда корхонада бир йилда 4 млн. 200 минг дона трикотаж маҳсулотлари ишлаб чиқарилмоқда. Ўтган йили 3 млн. долларлик сифатли ва бежирим маҳсулотлар Россия, Белоруссия, Қозоғистон каби давлатларга экспорт қилинди. Жорий йилда бу кўрсаткич 4 млн. долларни ташкил этиши режалаштирилган. Бу каби марраларни забт этишда булоқбошилик тикувчилар ҳам фаол иштирок этмоқда.