Фото: Халқ сўзи

Президентимизнинг беш муҳим ташаббусидан бири — ёшлар маънавиятини юксалтириш, улар ўртасида китобхонликни кенг тарғиб қилиш. Алишер Навоий номидаги Ўзбекистон Миллий кутубхонасида шу йилнинг 8 – 12 ноябрь кунлари ташкил этиладиган “INFOOLIB UZBEKISTAN-2021” X Миллий ахборот-кутубхона ҳафталиги ушбу эзгу мақсадга хизмат қилиши билан аҳамиятлидир.

Тадбир олдидан Ўзбекистон Миллий кутубхонасида ўтказилган матбуот анжуманида шу ҳақда сўз борди.

Таъкидланганидек, ҳафталик бир вақтнинг ўзида юртимиздаги кўплаб ахборот-кутубхона марказларида ҳам ташкил этилади. Бу йилги ҳафталикнинг ўзига хослиги илк маротаба “Ўзбекистон ёш кутубхоначилари, биз биргаликда ҳаракат қиламиз” шиори остида “Ёш кутубхоначилар форуми”нинг ўтказилишидир.

— Мақсадимиз мамлакатимизда ахборот-кутубхона соҳасини янада ривожлантириш, аҳолига ахборот олишнинг манбаи, шакл ва услубларини етказиш, ахборот-кутубхона фойдаланувчиларига хизмат кўрсатиш, китобхонлик ва китоб мутолаасини тарғиб қилишдан иборат, — дейди Ўзбекистон Миллий кутубхонаси директори Умида Тешабоева. — Ҳафталик доирасида жамоат ва халқаро ташкилотлар билан ҳамкорликда соҳа мутахассислари ва китобхонлар учун бир қатор маънавий-маърифий тадбирлар, давра суҳбатлари, танловлар, семинар-тренинглар, маҳорат дарсларини ўтказиш ҳамда нашриётлар иштирокида китоб кўргазмаси ва ярмаркаларини ташкил этиш, таниқли фан ва маданият намоёндалари, адиблар иштирокида ижодий учрашувлар, театрлаштирилган чиқишлар намойиш қилиш режалаштирилган.

Раҳмат БОБОЖОН, “Халқ сўзи”.